---
title: "ربط تابي وتمارا مع أودو: التقسيط في المتجر والكاشير وكيف تنضبط المحاسبة"
description: "أول بيعة بالتقسيط سهلة، الصعب أول مرتجع وأول تحويل أقل من المبيعات. كيف يمشي تابي وتمارا في متجر أودو والكاشير، ووين تروح الرسوم، وكيف تطابق التسوية."
lang: ar-SA
canonical: https://www.kerneltics.com/blog/odoo-tabby-tamara-integration
source: https://www.kerneltics.com/blog/odoo-tabby-tamara-integration
alternate_en: https://www.kerneltics.com/en/blog/odoo-tabby-tamara-integration
type: article
published: 2026-10-08T06:15:20.701Z
updated: 2026-10-08T06:15:20.791Z
author: "kerneltics"
tags: ["Odoo", "أودو", "تابي", "تمارا", "التقسيط", "نقاط البيع", "محاسبة"]
---

# ربط تابي وتمارا مع أودو: التقسيط في المتجر والكاشير وكيف تنضبط المحاسبة

> أول بيعة بالتقسيط سهلة، الصعب أول مرتجع وأول تحويل أقل من المبيعات. كيف يمشي تابي وتمارا في متجر أودو والكاشير، ووين تروح الرسوم، وكيف تطابق التسوية.

أول بيعة بتابي أو تمارا في متجرك يوم حلو. الزر يطلع في صفحة الدفع، والعميل يقسّم المبلغ ويمشي مبسوط.

المشكلة تبدأ بعدها بأسابيع. عميل يرجّع قطعة من ثلاث، والكاشير يسوي مرتجع في أودو، وبعد شهر يتصل العميل: «ليش ما زلت أدفع أقساط؟». أو المحاسب يفتح كشف البنك آخر الشهر ويلقى تحويل واحد من تمارا يغطي طلبات كثيرة، ومبلغه أقل من تقرير المبيعات، ويسأل: وين الباقي؟

هذا المقال عن الي ما يبان في صفحة الدفع: وش يصير لفلوسك، وكيف يكون الربط صح في المتجر والكاشير، وكيف تنضبط المحاسبة. وإذا لسا تختار بين البوابات نفسها، ابدأ من [بوابات الدفع في السعودية](https://www.kerneltics.com/blog/payment-gateways-in-saudi).

## فلوس التقسيط ما تمشي مثل فلوس البطاقة

مع البطاقة العميل يدفع وأنت تستلم. مع التقسيط فيه طرف ثالث في النص: العميل صار مديون لتابي أو تمارا على أقساط، وأنت الي يدفع لك المزود. وهذا يغيّر ثلاث أشياء:

- **المبلغ يوصلك صافي.** المزود ياخذ رسومه ويحوّل الباقي. نسبة الرسوم في عقدك معه، مو في أي مقال.
- **التحويل يجي مجمّع.** دفعة وحدة تغطي طلبات كثيرة، وممكن تنخصم منها مرتجعات نفس الفترة. تمارا مثلًا تشرح في [توثيق التسويات](https://docs.tamara.co/docs/pp-settle-invoice-understand-settlements) إن التسوية أسبوعية، وفيه نموذج يأجّل التحويل لين يوصل رصيدك حد معيّن. اقرأ الشروط الحالية في لوحة التاجر عندك.
- **الطلب له مراحل، والفلوس ما تتحرك إلا بعد مرحلة معيّنة.** وهذي تستاهل قسم لحالها.

## الموافقة شي، والتحصيل شي ثاني

لما العميل يكمّل الدفع، الطلب عند المزود يصير «موافق عليه» (`AUTHORIZED` عند تابي، و`authorised` عند تمارا). هنا الفلوس محجوزة، بس ما انحسبت لك. لازم نظامك يرسل طلب **تحصيل** (Capture) يقول فيه: الطلب مؤكد من جهتي. تابي تقول في [صفحة معالجة الدفع](https://docs.tabby.ai/pay-in-4-custom-integration/payment-processing) إن المدفوعات المحصّلة بس هي الي تنحوّل لك، وتمارا نفس الشي: التسوية ما تشمل إلا الطلبات المحصّلة.

ووش يصير لو ما حصّلت؟ حسب توثيق الاثنين، بعد 21 يوم من الموافقة تابي ممكن تحصّل المبلغ من جهتها، وتمارا تحصّله تلقائيًا ([مراحل الطلب عند تمارا](https://docs.tamara.co/docs/online-order-status-flow)). يعني طلب انلغى في أودو وما أحد بلّغ المزود، ممكن يتحصّل بعد ثلاث أسابيع على عميل ألغى طلبه. وهذي شكوى ما لها داعي.

فالقاعدة بسيطة:

- **قبل التحصيل** ما فيه استرجاع، فيه **إلغاء**. تابي تسميه إقفال الدفعة بدون تحصيل (Close)، وتمارا تسمح بالإلغاء ما دام الطلب في حالة `authorised`.
- **بعد التحصيل** أي رجوع للفلوس هو **استرجاع** (Refund).

وأي ربط مع أودو لازم يعرف وين واقف كل طلب من هالمراحل، مو بس «مدفوع ولا لا».

## المتجر الإلكتروني: لا تصدّق صفحة الرجوع

في المتجر، العميل يروح لصفحة تابي أو تمارا، يوافق، ويرجع لموقعك على رابط «تم الدفع». الغلط الشائع إن الإضافة تعتبر الرجوع لهالرابط دليل دفع. وأي أحد يعرف شكل الرابط يقدر يفتحه بدون ما يدفع.

الصح، وهو الي يقوله توثيق تابي نفسه: الرابط يعطيك رقم مرجع بس، ونظامك يسأل المزود مباشرة من السيرفر: وش حالة هالدفعة؟ ونفس الشي مع الإشعارات الي ترسلها البوابة (webhook): تعامل معها كتنبيه، والحالة الحقيقية تقراها من المزود.

والعكس يصير بعد: العميل يدفع ويقفل الصفحة قبل ما يرجع لموقعك. عند تابي الدفعة موافق عليها، وعندك في أودو ما فيه شي. والحل إن الإشعارات تكون مفعّلة وتلتقط الدفعة حتى لو العميل ما رجع. إذا شفت في لوحة تابي طلبات حالتها `NEW` وما لها طلب في أودو، فهذا السبب غالبًا.

## الكاشير: لا تعتمد على جوال العميل

في نقاط البيع ما فيه هامش. العميل واقف قدامك والبضاعة بيده، وأول ما تقفل الفاتورة يطلع من المحل.

الطريقة الي يشرحها توثيق [تابي لنقاط البيع](https://docs.tabby.ai/offline-payment-methods/pos-integration) و[تمارا للمتاجر](https://docs.tamara.co/docs/offlineinstore-checkout): الشاشة تعرض QR خاص بهالبيعة ومبلغها، العميل يمسحه بجواله ويوافق عند المزود، والنظام يسأل المزود عن الحالة. والي يهمك كصاحب محل: **زر التأكيد عند الكاشير لازم يبقى مقفول لين النظام نفسه يتأكد من المزود.** مو لين العميل يرفع جواله ويقول «تم»، لأن الي على جواله ممكن يكون صورة شاشة لعملية قديمة.

وفيه طريقة بدون ربط: الكاشير ينشئ العملية من تطبيق التاجر أو بوابة المزود، وبعدين يسجلها في أودو يدويًا كدفعة. تشتغل، بس صار عندك نظامين ما يعرفون بعض، وكل مرتجع ينسوى مرتين، وآخر الشهر تطابق بيدك. وعن الكاشير في أودو بشكل عام، كتبنا عن [نقاط البيع في أودو والفوترة الإلكترونية](https://www.kerneltics.com/blog/odoo-pos-and-zatca).

## المرتجعات: إشعار دائن في أودو ما يرجّع ريال

هذا أكثر شي ينغلط فيه. الإشعار الدائن (Credit Note) في أودو مستند محاسبي عندك، وتابي وتمارا ما يدرون عنه. والعميل يكمّل يدفع أقساط على شي رجّعه.

المرتجع الحقيقي طلب يروح للمزود نفسه، وما ينحسب إلا لما المزود يأكده. ومن توثيق تابي أشياء لازم تعرفها: تقدر ترجع المبلغ كامل أو على دفعات جزئية بشرط المجموع ما يتعدى المحصّل، وطلب الاسترجاع يكون خلال 180 يوم من إنشاء الدفعة، والاسترجاع الي انعالج ما ينلغى.

فاللي تبيه من الربط:

- **مرتجع جزئي من الكاشير.** العميل يرجّع قطعة من ثلاث، والكاشير يسوي مرتجع عادي، والنظام يرسل قيمة القطعة بس للمزود.
- **ما ينرسل مرتين.** ضغطة مزدوجة، أو كاشير انقطع عنه النت ورجع يزامن نفس المرتجع، ما لازم تطلع استرجاعين. تابي تدعم مفتاح يمنع التكرار (idempotency key) لهالسبب بالضبط، والربط لازم يستخدمه.
- **صلاحية.** مو كل مستخدم في أودو يقدر يرجّع فلوس. حدد مين.
- **سجل.** لما المزود يرفض الاسترجاع، تبي تقرا ردّه، مو تخمّن.

## المحاسبة: حساب وسيط لكل مزود

هنا القرار الي يوفر على المحاسب أيام: **لا تخلي مبيعات التقسيط تنزل على حساب البنك مباشرة.**

### الإعداد

من إعدادات المحاسبة في أودو، سوّ دفتر يومية (Journal) لكل مزود، نوعه بنك، باسم مثل «تابي وسيط» و«تمارا وسيط»، ولكل واحد حسابه. هذا مو بنك حقيقي، هذا رصيد المزود مديون لك فيه وما حوّله لسا. وافصل الاثنين: جداول التسوية والرسوم وشكل التقارير تختلف، ولو خلطتهم يصير أي فرق صغير بحث في الاثنين.

بعدين حط هالدفاتر في مكانين: في إعدادات بوابة الدفع (للمتجر والفواتير)، وفي طريقة الدفع في نقاط البيع. كذا مبيعات تابي من الموقع ومن الكاشير تتجمع في مكان واحد. وسوّ حساب مصروف لرسوم التقسيط.

### الدورة

- **البيع:** الفاتورة تنسدد بقيمتها الكاملة، والمبلغ يقعد في الحساب الوسيط.
- **المرتجع:** يطلع من نفس الحساب الوسيط، فلما التسوية الجاية تخصمه، الأرقام تتقابل.
- **التحويل:** لما توصل التسوية، تسجل قيد واحد من تقريرها: البنك مدين بالي وصل فعلًا، والرسوم وضريبتها مدينة، والحساب الوسيط دائن بمجموعهم، وهو نفسه المبيعات ناقص المرتجعات الي في التسوية. تمارا مثلًا تعرض في [لوحة التسويات](https://docs.tamara.co/docs/pp-settle-invoice-reports) المبيعات والمرتجعات والرسوم والضريبة وصافي التحويل كأعمدة منفصلة، يعني القيد قدامك جاهز.

### المطابقة

السر في المرجع. لما الربط ينشئ العملية عند تابي أو تمارا، لازم يرسل رقم مرجع من أودو (رقم الدفعة أو رقم طلب الكاشير). هالرقم يطلع في تقرير التسوية جنب كل طلب. فتمشي سطر سطر: الرقم من التقرير، تلقاه في الحساب الوسيط، تتأكد إن المبلغ نفسه، وتقفل المطابقة.

على Enterprise شاشة مطابقة البنك وقواعدها (Reconciliation Models) تختصر الشغل، وعلى Community تسويها يدويًا. النتيجة وحدة، الفرق في الوقت.

### فحص آخر الشهر

رصيد كل حساب وسيط آخر يوم في الشهر لازم يساوي المبيعات المحصّلة الي ما دخلت تسوية لسا، يعني آخر كم يوم بس. إذا الرصيد يكبر شهر ورا شهر، فيه شي ما ينقفل: تحويل انسجل كإيراد بدل ما يقفل الوسيط، أو رسوم في حساب غلط، أو مرتجع انسجل في أودو وما وصل المزود أصلًا.

### والضريبة؟

فاتورة العميل تبقى بقيمتها الكاملة وضريبتها العادية، والتقسيط ما يغيّر فيها شي (شوف [الفوترة الإلكترونية على أودو](https://www.kerneltics.com/blog/zatca-einvoicing-odoo)). أما رسوم المزود فخدمة يقدمها لك، ولها فاتورتها الضريبية منه. نزّلها من لوحة التاجر وخلّ المحاسب يسجلها.

## تشتري إضافة ولا تبني الربط؟

أي طريق تختاره، الأسئلة هي الأقسام الي فوق: التحصيل والإلغاء، والتحقق من المزود، والمرتجعات، والمرجع في التسوية. شرحنا كيف تفحص أي موديول في [تشتري إضافة من متجر أودو ولا تبنيها](https://www.kerneltics.com/blog/odoo-apps-store-vs-custom)، ومتى البرمجة تستاهل في [تطوير إضافات أودو حسب شغلك](https://www.kerneltics.com/blog/odoo-custom-addons-development).

ومثال من شغلنا: [تابي وتمارا لأودو](https://tabby.kerneltics.com) إضافة بنيناها وننشرها في متجر أودو. (الإضافة من تطويرنا، وما هي تابعة لتابي ولا تمارا.) تضيف الاثنين للمتجر ونقاط البيع والفواتير وعروض الأسعار، تقرا الحالة من المزود، وتقفل زر التأكيد في الكاشير لين يتأكد التحصيل، وفيها مرتجعات من أودو وسجل لطلبات الـ API، من نسخة 14 إلى 19 على Community وEnterprise. وحدودها بصراحة: المرتجع الجزئي لبيعة تمارا في الكاشير يتسوى من تمارا مباشرة، والإضافة ما تستورد تقرير التسوية ولا تسجل الرسوم. هذا شغل المحاسب الي شرحناه فوق، وفي موقعها دليل عن [مطابقة تحويلات تابي وتمارا](https://tabby.kerneltics.com/bnpl-accounting-odoo/).

## أسئلة سريعة

### أحتاج حساب تاجر عند تابي وتمارا قبل الربط؟

أي. أي ربط يوصل متجرك بحسابك، ما يفتح لك حساب. التسجيل عند كل مزود لحاله، ومن لوحته تاخذ مفاتيح التجربة ثم مفاتيح التشغيل.

### أشغّل الاثنين ولا واحد يكفي؟

حسب عملائك، وفيه متاجر تحط الاثنين. إذا شغلتهم، خل لكل واحد حسابه الوسيط من أول يوم. قارنّا بينهم في [تابي ولا تمارا](https://tabby.kerneltics.com/tabby-vs-tamara/).

### أنا على Odoo Online، أقدر أركّب إضافة تابي وتمارا؟

لا. حسب شروط متجر أودو، إضافات الطرف الثالث تنثبّت على Odoo.sh وعلى السيرفر الخاص، مو على Online.

## كيف نشتغل عليها

نبدأ من آخر الشهر مو من زر الدفع: نسوي الحسابات الوسيطة ونربطها بالبوابات وطرق الدفع في الكاشير قبل أول بيعة. بعدها نركّب [تابي وتمارا لأودو](https://tabby.kerneltics.com) على نسخة من قاعدة بياناتك، ونمشّي بيعة ومرتجع من المتجر ومن الكاشير بمفاتيح التجربة، ونطابقها مع تقرير المزود. ولما يركب كل شي، ننقل لمفاتيح التشغيل.

شوف [صفحة أودو](https://www.kerneltics.com/odoo) و[أودو مع الفوترة الإلكترونية](https://www.kerneltics.com/solutions/odoo-zatca)، أو [احجز استشارة](https://www.kerneltics.com/book).