تأسيس حساب واتساب API من الصفر، خطوة بخطوة لين يشتغل داخل أودو

أغلب الي يكلمونا عن واتساب API يكون عندهم نفس الصورة: «نبي الفواتير تطلع للعميل على الواتساب، والعميل يرد، والموظف يشوف كل شي». الفكرة واضحة. الطريق لها فيه ثمان محطات، وكل وحدة فيها غلطة معروفة تاخذ منك أسبوع لو ما انتبهت لها.

هذي الرحلة كاملة، بالترتيب الي نمشيه فعلًا، من حساب ميتا الفاضي لين الرسالة تطلع من أودو. لو بتسويها بنفسك، هذي الخريطة. ولو بتعطيها أحد، تعرف وش تسأله.

وإذا لسا ما قررت هل تحتاج الـ API أصلًا ولا يكفيك التطبيق، ابدأ من الفرق بين واتساب API وتطبيق واتساب للأعمال.

1. حساب ميتا للأعمال والتوثيق

كل شي يبدأ من Meta Business portfolio (كان اسمه Business Manager). هذا الحساب هو «المنشأة» عند ميتا، وتحته يجي حساب الواتساب والصفحات والإعلانات.

بعدها توثيق النشاط (Business verification): ترفع مستندات تثبت إن المنشأة حقيقية، عادة السجل التجاري، وميتا تطابقها مع البيانات الي كتبتها.

وين تتعطل:

• الاسم ما يطابق. كتبت اسم العلامة التجارية في الحساب، والسجل فيه الاسم الرسمي للمؤسسة. ميتا ترفض لأنها تقارن حرف بحرف. اكتب الاسم زي ما هو في السجل.
• الموقع ما يخص المنشأة. ميتا تبي نطاق (دومين) يرجع لنفس النشاط، وأحيانًا تطلب تثبت ملكيته. موقع فاضي أو صفحة إنستقرام بس تبطّئ الموضوع.
• الحساب مفتوح من إيميل موظف. يطلع الموظف وتطلع معه الصلاحيات. خل المالك أو إيميل رسمي للمنشأة هو المسؤول، وأضف الباقين كمستخدمين.

2. حساب واتساب للأعمال والرقم

تحت حساب ميتا تنشئ WhatsApp Business Account وتضيف له الرقم. والرقم هنا هو أكثر نقطة يصير فيها لخبطة:

• الرقم لازم يكون فاضي من التطبيق. لو الرقم شغال الحين على واتساب العادي أو واتساب للأعمال، تحذف الحساب منه أول (من إعدادات التطبيق، مو بس تحذف التطبيق من الجوال). الحل الأسهل كثير مرات: رقم جديد مخصص للـ API.
• كود التحقق يجي برسالة أو مكالمة. لو الرقم أرضي أو سنترال، اختر المكالمة وتأكد إن أحد بيرد عليها.
• رمز التحقق بخطوتين (PIN). تحطه وقت التسجيل، وأغلب الناس ينسونه. احفظه في مكان آمن عند المنشأة، لأنك بتحتاجه يوم تنقل الرقم لمنصة ثانية، ومن دونه النقل يتعقد.

3. اسم العرض ومراجعته

الاسم الي يشوفه العميل فوق المحادثة (Display name) ما ينحط وخلاص، ميتا تراجعه.

ليش ينرفض: لأنه ما له علاقة واضحة بالنشاط، أو فيه كلمات عامة بس («عروض»، «خدمة العملاء»)، أو فيه رموز وإيموجي، أو يوحي إنك جهة ثانية. القاعدة: اسم يطابق اسم نشاطك أو علامتك، ويقدر أحد يلاقيه في موقعك.

4. طريقة الدفع

ميتا تحاسب على الرسائل، مو على المنصة. فلازم تضيف وسيلة دفع على حساب الواتساب نفسه. من دونها الإرسال يتوقف أو يتقيّد.

السعر يختلف حسب نوع الرسالة ودولة المستلم، وميتا تغيّر التسعير بين فترة وثانية، فخذه دائمًا من صفحة ميتا الرسمية وقت ما تحسب، مو من مقال (ولا حتى هذا).

5. القوالب ونافذة الـ 24 ساعة

هنا يصير أكبر سوء فهم عن الـ API.

لو العميل راسلك، يفتح عندك نافذة خدمة مدتها 24 ساعة ترد فيها بأي رسالة عادية. لكن لو أنت الي تبدأ المحادثة (فاتورة، تذكير، عرض)، لازم تستخدم قالب معتمد مسبقًا من ميتا.

القوالب لها ثلاث فئات:

• تسويقية (Marketing): عروض وحملات.
• خدمية (Utility): فاتورة، تأكيد طلب، تذكير موعد، حالة شحنة.
• مصادقة (Authentication): رموز التحقق.

ليش تنرفض القوالب: محتوى تسويقي مصنّف على إنه خدمي، متغيرات في بداية أو نهاية الرسالة بدون نص حولها، روابط مختصرة، أو صياغة تهديد («سيتم إيقاف خدمتك»). اكتب القالب زي ما تكتبه لعميل تحترمه، وخل كل متغير له سياق.

6. حدود الإرسال وجودة الرقم

الرقم الجديد يبدأ بحد يومي لعدد العملاء الي تقدر تبدأ معهم محادثة، ويرتفع تدريجيًا مع الاستخدام السليم. وميتا تراقب جودة الرقم من تفاعل الناس: الحظر والبلاغات تنزلها.

الغلطة الكلاسيكية: أول يوم يرفعون كل أرقام العملاء القديمة ويرسلون حملة. الناس ما تتذكر إنها سجلت، تحظر، والجودة تطيح، والرقم يتقيّد أو يتوقف. ابدأ بالرسائل الي العميل ينتظرها (فواتيره وطلباته)، وأرسل التسويق لناس وافقوا عليه، وبدفعات صغيرة.

7. المنصة: الـ API مو تطبيق

بعد كل هذا، ما عندك شاشة. الـ API باب تقني، وتحتاج منصة فوقه يشتغل عليها الفريق: صندوق وارد، قوالب، حملات، بوت.

الطريق اليدوي يمر بلوحة المطورين في ميتا: تطبيق، وتوكنات، وويبهوك، وإعدادات لازم مطوّر. الطريق الأسهل هو التسجيل المدمج (Embedded Signup): نافذة رسمية من ميتا تفتح داخل المنصة، والعميل يسجل دخوله بفيسبوك ويختار حسابه ورقمه ويخلص. هذا متاح فقط للمنصات المعتمدة كمزوّد تقني عند ميتا.

8. الربط مع أودو: كيف يبان لما يشتغل صح

هنا القيمة الحقيقية. الواتساب لحاله قناة. مع أودو يصير جزء من الشغل:

• الفاتورة وتذكير الدفع يطلعون من أودو كقوالب خدمية معتمدة، أول ما تتأكد الفاتورة أو يقرب موعد الاستحقاق. ما أحد ينسخ ويلصق.
• أزرار في الرسالة ترجع لأودو. مثلًا: يوصل للمدير «إيصال تحويل جديد، تعتمده؟» مع زرين نعم ولا. يضغط نعم، والسجل في أودو يتحدث لحاله.
• العميل يطلب فواتيره من الواتساب. يكتب «أبي فواتيري»، البوت يجيب قائمتها من أودو، العميل يختار، ويوصله ملف PDF. أو يطلبها كلها وتوصله وحدة ورا الثانية.
• كل رسالة تنحفظ على سجل العميل. المحاسب يفتح العميل في أودو ويشوف وش انرسل له ومتى.

هذي أشياء بنيناها فعلًا لعملاء، مو تصور. والشرط الوحيد إن أودو نفسه مرتب: أرقام جوالات العملاء مكتوبة صح بمفتاح الدولة، والفواتير مرتبطة بالعميل الصحيح. ولو الربط يحتاج منطق خاص بشغلك، هنا يجي دور إضافات أودو المخصصة.

أسئلة سريعة

كم ياخذ التأسيس كامل؟

يعتمد على ميتا أكثر من أي أحد. التوثيق ومراجعة الاسم والقوالب كلها عندها، وأحيانًا تمر بسرعة وأحيانًا تطلب مستندات إضافية. جهّز السجل والموقع والإيميل الرسمي من البداية وتختصر أغلب التأخير.

أقدر أستخدم نفس الرقم الي عليه عملائي الحين؟

أي، بشرط تفصله عن التطبيق أول. قبل ما تسوي هذا، تأكد إن المنصة جاهزة، عشان ما يكون عندك رقم لا هو على التطبيق ولا عليه أحد يرد.

لازم يكون عندي أودو عشان أستفيد؟

لا. الـ API والمنصة يشتغلون لحالهم. أودو يضيف إن الرسائل تطلع من بياناتك الحقيقية بدون تدخل. وإذا تبي البوت يرد بذكاء بدل الأزرار، شوف ربط الذكاء الاصطناعي بواتساب.

وش الفرق بين توثيق النشاط والعلامة الموثقة؟

توثيق النشاط شرط عشان تشتغل براحتك. العلامة الموثقة جنب الاسم طلب منفصل بشروط أعلى، وأغلب المنشآت تشتغل بدونها بدون مشكلة. تفاصيل أكثر في واتساب API للمتاجر في السعودية.

كيف نشتغل عليها

ناخذها من الصفر لين أول فاتورة تطلع من أودو على واتساب العميل: حساب ميتا والتوثيق، الرقم والاسم، القوالب، ثم الربط مع أودو وأي منطق خاص بشغلك.

والمنصة الي نشتغل عليها منصتنا K-Message: كيرنلتكس مزوّد تقني معتمد من ميتا، فتربط رقمك بنفسك من نافذة ميتا الرسمية، ويشتغل فريقك من صندوق وارد واحد بقوالب وحملات وبوت بالذكاء الاصطناعي.

التفاصيل في صفحة واتساب API وأودو والفوترة الإلكترونية، أو احجز استشارة ونرسم معك الرحلة على وضعك أنت.