كم تكلفة تصميم موقع في السعودية؟ ليش العروض تختلف بهالشكل، وكيف تقارن بينها

أكثر رسالة تجينا على الواتساب هي: «كم تكلفة تصميم موقع؟» بدون أي تفاصيل. والجواب الصادق اللي نرد فيه كل مرة: «ما نقدر نقول لك قبل ما نعرف وش تبي بالضبط».

ونعرف إنه جواب يزعج. أنت تبي رقم عشان تعرف إذا الموضوع في متناولك ولا لا. بس أي شركة تعطيك رقم قبل ما تسألك ولا سؤال، هي تخمّن. وإما إنها بترجع تزيد عليك بعدين، أو إنها بتبني لك شي ما يشبه اللي في بالك.

هذا المقال ما بيعطيك رقم. بيعطيك أهم من الرقم: وش اللي يحرّك السعر فعلًا، وش التكاليف اللي تجي بعد التسليم، ليش تجيك عروض ما تشبه بعض، وكيف تقارن بينها بدون ما تنغش.

ليش ما فيه شي اسمه «سعر الموقع»؟

كلمة «موقع» تشمل أشياء ما تشبه بعض أبدًا:

• صفحة تعريفية وحدة فيها رقمك وموقعك وخدماتك.
• موقع شركة بخمس صفحات أو عشر، يتعدّل مرة كل كم شهر.
• متجر إلكتروني فيه منتجات ومخزون ودفع وشحن.
• منصة فيها تسجيل دخول للعملاء وحجوزات ولوحة تحكم وتقارير.

الفرق بين الأول والأخير مثل الفرق بين «أبي سيارة» و«أبي شاحنة نقل». كلها لها إطارات ومحرك، بس ما أحد يتوقع نفس السعر. فلما تسأل «كم الموقع؟» كأنك تسأل «كم السيارة؟». السؤال الصح هو: «كم يكلف الموقع اللي يسوي كذا وكذا؟» وهذا اللي بنعلمك تحدده.

تكلفة تصميم موقع حسب نوعه

هذي الصورة لكل نوع: وش يدخل فيه، وش اللي يكبّر فاتورته، ووش يبقى يكلّفك بعد ما ينطلق.

نوع الموقع	وش يشمل عادة	وش يرفع سعره	وش يكلّف بعد الإطلاق
صفحة تعريفية	صفحة وحدة، زر واتساب أو اتصال، خريطة	تصميم خاص، لغة ثانية	النطاق والاستضافة
موقع شركة	صفحات ثابتة، نموذج تواصل، صفحة مشاريع أو خدمات	لوحة تحكم، كتابة المحتوى، لغتين	نفسها، وتعديلات المحتوى
متجر إلكتروني	منتجات، سلة، دفع، شحن، حسابات عملاء	عدد المنتجات وتنوعها، ربط المخزون أو المحاسبة	عمولة الدفع، الإضافات المدفوعة، الصيانة
منصة أو نظام حجز	حسابات، صلاحيات، لوحة تشغيل، تقارير	كل وظيفة جديدة وكل ربط مع نظام ثاني	استضافة أقوى، دعم، تطوير مستمر

لاحظ إن العمود الأخير ما يختفي أبدًا. الموقع مو شي تشتريه مرة وتنساه.

وش اللي يرفع تكلفة تصميم الموقع فعلًا

1. عدد الصفحات ونوعها

الصفحات مو كلها سوا. صفحة «من نحن» تنكتب مرة وتنسى. أما صفحة «المشاريع» اللي تبي تضيف لها مشروع كل شهر، فهي تحتاج لوحة تحكم وقاعدة بيانات وتصميم يستوعب مشروع واحد أو خمسين. لما تحسب صفحاتك، فرّق بين الصفحة الثابتة والصفحة اللي «تتغذى» من محتوى يتجدد.

2. التصميم: قالب جاهز ولا تصميم خاص فيك

فيه طريقتين: تأخذ قالب جاهز وتعدّل ألوانه ونصوصه، أو يُصمَّم لك موقع من الصفر على هوية شركتك. القالب أسرع وأرخص، وعيبه إن موقعك بيشبه غيرك، وكل ما حاولت تطلع عن حدود القالب صار التعديل أصعب من البناء. التصميم الخاص أغلى لأن فيه مصمّم يفكّر في كل شاشة، وفيه جولات مراجعة، وبعدها مبرمج يحوّل التصميم لكود.

ما فيه واحد أفضل من الثاني دايم. لمحل يبي حضور محترم على قوقل، القالب الزين يكفي. لشركة تنافس على الانطباع الأول، ما يكفي.

3. لوحة التحكم: هل تبي تعدّل المحتوى بنفسك؟

هذا أكثر بند ينساه الناس. إذا كل تغيير في نص أو صورة أو سعر يحتاج تتصل على المبرمج، فالموقع رخيص اليوم وغالي كل شهر بعده. لوحة التحكم (اللي يسمّونها CMS) تخليك أنت أو موظفك تعدّلون بدون أحد. بناؤها أو إعدادها يرفع السعر الأول، وينزّل تكلفة الموقع على مدى عمره.

4. الوظائف: كل «زر» وراه شغل

هنا يصير الفرق الكبير بين العروض. كل وظيفة من هذي تعني تصميم واختبار وغالبًا ربط مع جهة خارجية:

• تسجيل دخول وحسابات للعملاء.
• دفع إلكتروني (ووراه بوابة دفع وتحقق واسترجاع).
• حجز مواعيد أو طلبات.
• بحث وفلترة في منتجات كثيرة.
• ربط مع نظام موجود عندك، مثل أودو أو نظام المحاسبة أو واتساب.

لما تكتب متطلباتك، حط قائمة بكل شي المستخدم يقدر «يسويه» في الموقع، مو بس اللي يقدر «يقراه». هذي القائمة هي اللي يختلف عليها السعر أكثر من أي شي ثاني.

5. لغتين مو ترجمة

الموقع العربي والإنجليزي مو موقع واحد مترجم. هو تصميم لازم يشتغل من اليمين لليسار ومن اليسار لليمين، وخطوط مختلفة، ومحتوى مضاعف، وصفحات مضاعفة عند قوقل. مو مستحيل ولا معقّد، بس هو شغل إضافي فعلي، وأي عرض ما يذكر اللغة الثانية غالبًا ما يشملها.

6. المحتوى: مين يكتب ومين يصوّر؟

النصوص والصور هي اللي يشوفها العميل، والموقع بدونها هيكل فاضي. إذا عندك محتوى جاهز، زين. إذا ما عندك، فإما تكتبه أنت أو تدفع لأحد يكتبه ويصوّر. وأكثر سبب نشوفه لتأخّر المشاريع مو التصميم ولا البرمجة، هو محتوى ما وصل. اسأل الشركة صراحة: «المحتوى داخل السعر؟» وأغلب الوقت الجواب لا.

7. اللي ما تشوفه بعينك: السرعة والظهور في قوقل والأمان

موقعين شكلهم واحد، واحد يفتح على طول ويطلع في قوقل، والثاني بطيء وما أحد يلاقيه. الفرق في شغل تحت السطح: إعدادات الفهرسة، سرعة التحميل، الحماية، النسخ الاحتياطي. الشركة اللي تسوي هذا الشغل بتسعّره، واللي ما تسويه بتكون أرخص وما بتقول لك ليش. كتبنا مقال كامل عن ليش المواقع ما تطلع في قوقل، وأغلب أسبابه تنحل لو انبنى الموقع صح من البداية.

تكلفة إنشاء موقع إلكتروني ما تنتهي يوم التسليم

الموقع له مصاريف كل سنة حتى لو ما لمسته، وفيه بنود ما تنكتب في العرض أصلًا. اسأل عن كل وحدة قبل ما توقّع:

• النطاق (الدومين): يتجدد كل سنة. انتبه لسعر التجديد مو سعر السنة الأولى، لأن بعض الجهات ترخّص السنة الأولى أو تعطيها مجانًا. ولازم يكون مسجّل باسمك أنت.
• الاستضافة: شهرية أو سنوية، وتختلف حسب الموقع. صفحة تعريفية خفيفة ما تحتاج اللي يحتاجه متجر زياراته كثيرة.
• شهادة SSL (القفل جنب الرابط): كثير من الاستضافات اليوم تعطيها بدون رسوم إضافية. إذا شفتها بند منفصل بسعر، اسأل ليش.
• الإيميل باسم شركتك: غالبًا اشتراك لكل مستخدم، مو داخل الموقع.
• القوالب والإضافات المدفوعة: لها تراخيص تتجدد، وإذا وقف التجديد وقفت تحديثاتها الأمنية معه.
• عمولة بوابة الدفع: للمتجر، على كل عملية بيع. هذي على مبيعاتك مو على الموقع، بس لازم تدخل حسبتك. فصّلناها في مقال بوابات الدفع في السعودية.
• ضريبة القيمة المضافة: اسأل هل الرقم شامل الضريبة ولا قبلها. عرضين بنفس الرقم، واحد شامل والثاني لا، مو نفس السعر.
• الفوترة الإلكترونية للمتجر: إذا منشأتك مسجلة في الضريبة، فواتيرك لازم تطلع بمتطلبات هيئة الزكاة والضريبة والجمارك، والموقع لازم يوصل الطلب للنظام اللي يصدرها. شرحنا مراحل الفوترة الإلكترونية وكيف تنربط بأودو.
• الصيانة نفسها: التحديثات الأمنية، النسخ الاحتياطي، والتعديلات الصغيرة. بعض الشركات عندها باقة شهرية، وبعضها بالساعة، وبعضها تسكت لين تطلب.

مين يبني لك الموقع؟ منصة، مستقل، ولا شركة

اسعار تصميم المواقع تختلف كثير حسب مين يسويها، وكل خيار يناسب حالة:

• منصة جاهزة تبنيه عليها بنفسك: تدفع اشتراك وتعطيه من وقتك. تنفع لصفحة تعريفية أو متجر بسيط. حدودها إن اللي ما توفره المنصة ما ينسوى، والطلعة منها غالبًا صعبة، والربط مع أنظمتك يوقف عند اللي تسمح فيه.
• مستقل: غالبًا أرخص لأن ما وراه تكاليف فريق. ينفع لمشروع واضح ومحدود. الخطر إنه شخص واحد: إذا انشغل وقف المشروع، ونادر تلقى التصميم والبرمجة والمحتوى والظهور في قوقل كلها عند شخص واحد.
• شركة: مصمم ومبرمج ومدير مشروع، فالسعر أعلى. تستاهل لما فيه وظائف وربط مع أنظمة، أو لما تبي جهة تتحمل الموقع بعد سنة. وقبل ما توقّع، اسألها الأسئلة اللي تكشف لك الشركة التقنية.

القرار مو على السعر بس، على حجم الشغل ومين بيصونه بعد التسليم.

ليش العروض تختلف بهالشكل؟

بعد ما تعرف اللي فوق، يصير الجواب واضح. الأسباب اللي نشوفها دايم:

• كل شركة فهمت طلبك بطريقتها. لما ترسل «أبي موقع لشركتي» بدون تفاصيل، وحدة تخيّلت خمس صفحات والثانية تخيّلت منصة كاملة، وسعّرت كل وحدة اللي في بالها.
• واحد يسعّر قالب والثاني يسعّر تصميم خاص. ولا واحد فيهم قال لك أي واحد.
• واحد ضمّن المحتوى واللغتين والصيانة، والثاني لا. فالعرض الغالي أحيانًا هو الأشمل مو الأغلى.
• حجم الفريق. مستقل واحد، فريق صغير، أو وكالة فيها مدير حسابات ومدير مشروع. كل مستوى له تكاليف تشغيل مختلفة، وهذي مو دايم تنعكس على جودة موقعك، بس تنعكس على السعر.
• العرض الرخيص جدًا يعرف إنه بيرجع لك. يدخل بسعر يكسب فيه المشروع، وكل شي بعده «إضافة».

كيف تقارن عرضين بشكل عادل

أول خطوة قبل ما تطلب أي عرض: اكتب صفحة وحدة فيها وش تبي. الصفحات، الوظائف، اللغات، هل تبي تعدّل بنفسك، وش عندك من محتوى. أرسل نفس الصفحة لكل الشركات. بدون هذي الخطوة أنت ما تقارن عروض، أنت تقارن تخمينات.

بعدها قارن على هذي النقاط، مو على الرقم النهائي:

• وش داخل السعر بالضبط؟ اطلب قائمة مكتوبة. الغموض هنا يصير خلاف بعدين.
• مين يملك الموقع؟ الكود، النطاق، حساب الاستضافة، حسابات الخدمات. لازم تكون باسمك أنت. إذا الشركة اختفت، تقدر تكمّل مع غيرها؟
• هل الموقع على منصة تحبسك فيها؟ بعض المنصات ما تقدر تنقل موقعك منها. مو دايم مشكلة، بس لازم تعرف قبل.
• كم جولة مراجعة للتصميم؟ ووش يصير لو ما عجبك؟
• كيف تنقسم الدفعات؟ دفعات مربوطة بمراحل تشوفها بعينك (تصميم معتمد، نسخة تجريبية، إطلاق) أسلم لك من المبلغ كامل مقدم.
• وش يصير بعد التسليم؟ كم مدة الضمان على الأخطاء؟ وكيف تتسعّر التعديلات؟
• وش تحتاج الشركة منك ومتى؟ المحتوى، الشعار، الموافقات. المدة اللي في العرض غالبًا تفترض إنك بتجاوب على طول.

كيف تنزّل التكلفة بدون ما تدفع مرتين

• ابدأ بالمرحلة الأولى بس. الصفحات اللي تجيب عميل اليوم وزر تواصل واضح. الحجز والحسابات والتقارير تنتظر لين تشوف الطلب عليها.
• جهّز المحتوى قبل البداية. النصوص والصور والشعار. كل أسبوع انتظار هو مشروع واقف.
• قرر اللغتين من أول يوم. إضافة الإنجليزي لموقع ما انبنى لها أصعب من بنائها معه.
• يمكن ما تحتاج موقع كامل الحين. للإعلانات تكفيك صفحة هبوط وحدة للحملة، وللمحل اللي يجيه الناس ملف نشاطك التجاري في قوقل مجاني ويجيب زباين قبل الموقع.

اللي لا توفّر فيه: الملكية، السرعة، والأساس اللي يخلي الموقع يكبر. هذي اللي توفيرها اليوم تدفعه مرتين بكرة.

الرخيص اللي يطلع غالي، والغالي اللي يطلع غالي بلا داعي

نشوف الحالتين. الرخيص اللي يطلع غالي: موقع على قالب مقفول، بدون لوحة تحكم، النطاق باسم الشركة مو باسمك، ما يطلع في قوقل، وكل تعديل بفلوس. بعد سنة تعيد بناءه من الصفر وتدفع مرتين.

والغالي بلا داعي: شركة بخمس صفحات ثابتة أخذت عرض «منصة» بتصميم خاص لكل شاشة ولوحة تحكم لمحتوى ما بيتغيّر. الشغل ممتاز بس أنت ما تحتاجه.

الموقع الصح هو اللي يناسب حجم شغلك اليوم، وينبني بطريقة تسمح له يكبر بكرة بدون ما تهدمه.

أسئلة سريعة عن تكلفة تصميم المواقع

وش أرخص طريقة يكون لي فيها موقع؟

إنك تبنيه بنفسك على منصة جاهزة: تدفع الاشتراك والنطاق وتعطيه من وقتك. وإذا كل اللي تبيه إن الناس تلاقيك، ابدأ بملف نشاطك في قوقل. بس الرخيص الحقيقي هو الموقع اللي ما تحتاج تعيد بناءه بعد سنة.

كم سعر تصميم موقع إلكتروني بخمس صفحات؟

يعتمد على اللي داخل الخمس: قالب ولا تصميم خاص، لغة ولا لغتين، مين يكتب المحتوى، وهل فيه لوحة تحكم. خمس صفحات بقالب ومحتوى جاهز منك شي، وخمس صفحات بتصميم خاص ولغتين ومحتوى مكتوب لك شي ثاني. عشان كذا أي باقة بسعر ثابت لازم يكون نطاقها مكتوب جنب سعرها.

كم تكلفة صيانة الموقع في السنة؟

اجمع البنود اللي فوق: تجديد النطاق، الاستضافة، الإيميل، تراخيص القوالب والإضافات، والصيانة نفسها. اطلبها في العرض بنود منفصلة، عشان تعرف وش تدفع لو بغيت تنقل لجهة ثانية.

كم ياخذ تصميم الموقع وقت؟

يعتمد على حجم الشغل، بس أكثر شي يطوّله نشوفه من جهة العميل: المحتوى والموافقات. اكتبوا موعد لكل مرحلة، ووش مطلوب منك قبل كل موعد.

متجر على منصة جاهزة ولا متجر مبرمج لك؟

ابدأ بالمنصة إذا منتجاتك وطريقة بيعك عادية. فكّر في متجر مبرمج لك لما تحتاج شي ما توفره: ربط مع المخزون أو أودو، تسعير خاص لكل عميل، أو طريقة شراء مختلفة عن المعتاد.

الخلاصة

ما فيه «سعر موقع» لأن ما فيه «موقع» واحد. اكتب اللي تبيه في صفحة، خذ عروض على نفس الصفحة، وقارن اللي داخل العرض مو الرقم اللي تحته. وأي شركة تعطيك رقم قبل ما تسألك، اسألها أنت: «مبني على وش؟»

كيف نشتغل عليها

في كيرنلتكس، الموقع التعريفي له باقة على صفحة الخدمات سعرها منشور ونطاقها مكتوب جنبها: من 5 إلى 9 صفحات، عربي وإنجليزي، نموذج تواصل، معرض صور، ودومين مجاني أول سنة. وأي شي فوق هذا (متجر، حجز، ربط مع أودو أو واتساب) ما نسعّره قبل ما نكتب نطاقه معك. وتقدر تشوف مشاريع اشتغلناها وهي شغالة في صفحة المشاريع. وإذا تبي أحد يجلس معك نص ساعة يساعدك تكتب صفحة المتطلبات، حتى لو بتاخذها لشركة ثانية، احجز جلسة 30 دقيقة مجانية.