أسعار تطبيقات الجوال في السعودية: كم تكلفة تطوير تطبيق؟ ووش يحدد السعر فعلاً

«كم سعر التطبيق؟» سؤال مثل «كم سعر البيت؟». أسعار تطبيقات الجوال في السعودية تختلف بأضعاف من عرض لعرض، والجواب الصادق: يعتمد على وش تبي. والي يعطيك رقم قبل ما يسألك، يعطيك رقم عشوائي.

ما راح نكتب أسعار تطوير هنا. مو تهرّب، بس لأن أي رقم بدون نطاق يضلل، والنطاقات المنشورة في النت عريضة لدرجة إنها ما تقول لك شي عن تطبيقك أنت. الي بنسويه أنفع: نفتح لك الفاتورة بند بند، علشان لما يجيك عرض تعرف وش تقارن، وليش عرضين لنفس «التطبيق» يختلفون بأضعاف. الأرقام الوحيدة في المقال هي رسوم Apple وGoogle وشروطهم، لأنها منشورة على صفحاتهم.

قبل كل هذا، إذا مو متأكد إنك تحتاج تطبيق أصلاً، اقرأ متى تحتاج تطبيق ومتى يكفيك موقع جوال. ناس كثير يوفرون المبلغ كله هناك.

تكلفة تطوير تطبيق جوال حسب نوعه

كلمة «تطبيق» تشمل أشياء ما تشبه بعض. هذي الصورة لكل نوع: وش يدخل فيه، وش يكبّر فاتورته، ووش يبقى يكلّفك بعد الإطلاق.

نوع التطبيق	وش يشمل عادة	وش يرفع سعره	وش يكلّف بعد الإطلاق
تطبيق عرض ومحتوى	شاشات عرض، إشعارات، زر تواصل أو واتساب	تصميم خاص، لغتين، تسجيل دخول	حسابات المتاجر، الخادم، شروط المتاجر الجديدة
تطبيق متجر أو حجز	حسابات، سلة أو مواعيد، دفع، لوحة تحكم	ربط المخزون أو أودو، حالات طلب كثيرة	عمولة الدفع، رسائل التحقق، الصيانة
تطبيق متعدد الأطراف (توصيل، خدمات)	تطبيق عميل، تطبيق سائق أو فني، لوحة تشغيل	التتبع اللحظي، التوزيع التلقائي، التحصيل النقدي	الخرائط، خادم أقوى، دعم السائقين
نظام داخلي للشركة	صلاحيات، تقارير، ربط مع أنظمتك	عدد الأدوار والتقارير والربط	الاستضافة، تطوير مستمر

العمود الأخير ما يختفي أبداً. التطبيق مو شي تشتريه مرة وتنساه. ونفس الطريقة شرحنا فيها تكلفة تصميم موقع في السعودية، والتطبيق نفس المنطق مع بنود أكثر.

البنود الثمانية الي تصنع سعر التطبيق

1. عدد الشاشات والوظائف

التطبيق مجموعة شاشات، وكل شاشة لها منطق خلفها. تطبيق فيه تسجيل، قائمة، تفاصيل، سلة، دفع، حساب، وإشعارات هو حوالي عشر شاشات مع منطقها. وتطبيق التوصيل فيه تطبيق عميل وتطبيق سائق ولوحة تشغيل، يعني ثلاث تطبيقات مو واحد، وفصّلنا الأجزاء الي ما يشوفها العميل في تطبيق التوصيل.

وش يرفع السعر هنا: كل وظيفة «صغيرة» لها تفاصيل: الدفع يحتاج حالات الفشل، الخريطة تحتاج تتبع، الدردشة تحتاج إشعارات فورية. اكتب قائمة الوظائف قبل ما تطلب عرض، وحدد وش أساسي في النسخة الأولى ووش يجي بعدين.

2. النظام الخلفي (Backend)

الجزء الي ما يشوفه العميل، وكثير مرات هو الأثقل. الخادم الي يحفظ البيانات، يتعامل مع الحسابات، يرسل الإشعارات، ويربط مع الدفع والخرائط. التطبيق بدون نظام خلفي واجهة فاضية.

وش يرفع السعر هنا: التعقيد في البيانات (طلبات لها حالات كثيرة، صلاحيات مختلفة، تقارير)، والربط مع أنظمة موجودة مثل أودو أو نظام محاسبة. الخبر الحلو: النظام الخلفي نفسه يخدم الموقع والتطبيق ولوحة التحكم، فما تدفعه مرتين. واسأل: الخادم على حساب مين؟ فاتورة السحابة لازم تكون باسمك أنت.

3. لوحة التحكم

أي تطبيق يحتاج مكان تدير فيه المستخدمين والطلبات والمحتوى. لوحة بسيطة أرخص بكثير من لوحة فيها تقارير وصلاحيات متعددة وتوزيع تلقائي. حدد مين يستخدمها ووش يحتاج يشوف.

4. منصة وحدة ولا ثنتين

تطبيق iOS وتطبيق أندرويد كل واحد بكود منفصل يعني فريقين وضعف الصيانة. التقنيات المشتركة مثل Flutter (الي نشتغل فيها) تبني الاثنين من كود واحد، وهذا يقلل التكلفة والوقت بشكل واضح بدون ما تخسر شي في أغلب التطبيقات التجارية. التطبيقات الي تحتاج كود أصلي لكل منصة (ألعاب، معالجة فيديو ثقيلة) قليلة. ولو الاستخدام نادر، يمكن موقع جوال سريع يكفيك عن الاثنين.

5. التصميم

تصميم الشاشات قبل البرمجة. تصميم مخصص لهويتك يأخذ وقت أكثر من تصميم على مكونات جاهزة. الاثنين مقبولين، بس لازم تعرف وش داخل عرضك. والتصميم بالعربي مو ترجمة للإنجليزي: اتجاه الشاشة، الخطوط، الأرقام، كلها شغل.

6. الربط الخارجي

كل خدمة خارجية لها تكلفة ربط وأحياناً اشتراك: بوابة الدفع، الخرائط، الرسائل النصية للتحقق، الإشعارات، الواتساب. اطلب قائمة بالخدمات الخارجية واشتراكاتها، لأنك أنت الي تدفعها بعد التسليم.

وفيه نقطة تغيّر الحسبة كلها: وش تبيع داخل التطبيق؟ إذا تبيع اشتراك أو محتوى رقمي أو ميزة تنفتح داخل التطبيق، إرشادات مراجعة Apple (البند 3.1.1) وسياسة الدفع في Google Play تلزمك بنظام الشراء داخل التطبيق حقهم، وعليه عمولة. أما إذا تبيع منتج أو خدمة تنستهلك برا التطبيق، مثل توصيل طلب أو موعد أو تغيير زيت، فلازم تحصّلها ببوابة دفع عادية أو Apple Pay (البند 3.1.3(e) عند Apple، ونفس الاستثناء عند Google). يعني تطبيق التوصيل ما يدفع عمولة المتجر، بس يدفع عمولة بوابة الدفع، وشرحناها في مقال بوابات الدفع في السعودية.

7. النشر في المتاجر

فيه حسابين مطوّرين تدفعهم أنت مباشرة: برنامج مطوّري Apple بـ 99 دولار لكل سنة عضوية (ويطلع لك بعملتك وقت التسجيل)، وGoogle Play برسوم تسجيل 25 دولار مرة وحدة. وكم شي يفاجئ الناس هنا:

• حساب Apple باسم المنشأة يحتاج رقم D-U-N-S. Apple تتحقق فيه من الكيان القانوني وعنوانه، وما تقبل الاسم التجاري ولا الفرع، واسم المنشأة هو الي يطلع كبائع تحت التطبيق. جهّزه قبل ما يخلص التطبيق، مو بعده.
• حساب Google الشخصي الجديد يحتاج اختبار مغلق. الحسابات الشخصية الي انفتحت بعد 13 نوفمبر 2023 لازم تشغّل اختبار مغلق فيه 12 مختبر على الأقل، مشتركين 14 يوم متواصلة، قبل ما تطلب النشر للعموم. أسبوعين لازم يدخلون الجدول.
• شروط المراجعة تصير شغل برمجة. Apple تطلب رابط سياسة خصوصية في صفحة التطبيق وداخله. وإذا التطبيق فيه إنشاء حساب، لازم المستخدم يقدر يحذف حسابه من داخل التطبيق. وإذا الدخول الأساسي بحساب Google أو غيره، لازم تعطي خيار دخول ثاني يحفظ خصوصية الإيميل. كل وحدة من هذي شاشة ومنطق، والعرض الي ما يذكرها بيرجع لك برفض.

وApple تقول إنها تراجع نص الطلبات على الأقل في أقل من 24 ساعة، و90% منها في أقل من 48 ساعة، والطلب الناقص يتأخر أو ينرفض. يعني المراجعة نفسها غالباً سريعة، الي ياخذ وقت هو الرفض والتعديل، وهذا يتكرر مع كل تحديث.

8. الصيانة بعد الإطلاق

هذا البند الي يختفي من العروض الرخيصة، وهو مو اختياري، لأن المتاجر نفسها ترفع شروطها كل سنة:

• Apple من 28 أبريل 2026 ما تقبل رفع تطبيق إلا إذا انبنى بـ Xcode 26 وأدوات iOS 26.
• Google Play من 31 أغسطس 2026 تطلب إن أي تطبيق جديد أو تحديث يستهدف أندرويد 16. والتطبيقات الموجودة الي تستهدف أقل من أندرويد 15 ما تطلع للمستخدمين الجدد على الأجهزة الي نظامها أحدث.

يعني التطبيق الي ما أحد لمسه سنة، أول ما تبي تصلح فيه خطأ صغير لازم تحدّثه كامل قبل. وفوقها تحديثات المكتبات والأمان. اسأل: وش تكلفة الصيانة الشهرية أو السنوية، ووش تشمل بالضبط، ومين يتابع مواعيد المتاجر.

مصاريف ما تنكتب في العرض

بعد التسليم فيه فواتير تجيك كل شهر أو كل سنة، وأغلبها باسمك مو باسم المطوّر. اطلبها مكتوبة قبل ما توقّع:

• حسابات المتاجر: Apple كل سنة، وGoogle مرة وحدة.
• الخادم والتخزين: يكبر مع عدد المستخدمين والصور والملفات.
• الخرائط: تنحسب غالباً حسب الاستخدام، وتطبيق التوصيل يستهلكها كثير.
• رسائل التحقق (OTP): كل رسالة نصية لها سعر.
• رسائل الواتساب: إذا التطبيق يرسل تأكيد الطلب على الواتساب، ميتا تحسب على الرسالة. شرحنا وش تدفع لميتا ووش تدفع للمنصة.
• عمولة الدفع: على كل عملية، أو عمولة المتجر إذا تبيع محتوى رقمي.
• ضريبة القيمة المضافة: اسأل هل رقم العرض شامل الضريبة ولا قبلها.
• الفوترة الإلكترونية: إذا التطبيق يبيع ومنشأتك مسجلة في الضريبة، فواتيرك لازم تطلع بمتطلبات الهيئة من النظام الي يصدرها. شرحنا مراحل الفوترة الإلكترونية وربطها بأودو.
• الخصوصية: بيانات عملائك الشخصية يحكمها نظام حماية البيانات الشخصية في السعودية، فاسأل مستشارك وش يطلب من تطبيقك قبل الإطلاق.

مين يبني التطبيق؟ مستقل، شركة محلية، ولا فريق برا

• مستقل: غالباً أرخص، وينفع لتطبيق صغير وواضح. الخطر إن التطبيق يحتاج تصميم وواجهة وخادم ونشر وصيانة، ونادر تلقاها كلها عند شخص واحد، وإذا انشغل وقف كل شي.
• شركة محلية: أغلى، بس فيها فريق يتحمّل التطبيق بعد سنة، ويعرف الدفع المحلي والتصميم بالعربي.
• فريق برا السعودية: ممكن يكون أرخص بالساعة، بس احسب فرق الوقت واللغة، ومين بيختبر التطبيق بالعربي ومع بوابات الدفع المحلية.

القرار مو على السعر بس. السؤال الأهم: مين بيصون التطبيق بعد التسليم، والكود والحسابات باسم مين؟ وقبل ما توقّع مع أي أحد، اسأله الأسئلة الي تكشف لك الشركة التقنية.

كم ياخذ وقت، ووين تروح الفلوس؟

التطبيق يمشي على مراحل، وكل مرحلة لها نصيب من الفاتورة:

1. تحديد النطاق: رحلة المستخدم وقائمة الوظائف. أرخص مرحلة، والي توفّر أكثر شي.
2. التصميم: شاشات تجربها قبل البرمجة. التعديل هنا أرخص بكثير من التعديل بعد ما ينبرمج.
3. البرمجة على مراحل: الخادم، ثم التطبيق، ثم اللوحة، وكل مرحلة تجربها على جوالك.
4. الاختبار: على أجهزة مختلفة، بالعربي والإنجليزي، ومع دفع حقيقي.
5. النشر: حسابات المتاجر، المراجعة، والاختبار المغلق عند Google إذا الحساب شخصي.
6. إطلاق تجريبي: لعدد محدود أول، تصلح الي يطلع، ثم للكل.

المدة تعتمد على النطاق، بس أكثر شي يطوّلها نشوفه برا البرمجة: قرارات تتأخر، محتوى ما وصل، وحسابات متاجر ما انفتحت إلا آخر أسبوع.

ليش العرض «الرخيص» يكلف أكثر

العرض الي بربع السعر غالباً حذف واحد أو أكثر من هذي:

• النظام الخلفي ضعيف أو على خدمة جاهزة ما تكبر معك.
• الكود مو باسمك، أو مبني على قالب مشترك مع تطبيقات كثيرة غيره.
• حسابات المتاجر باسم المطوّر، فالتطبيق فعلياً مو ملكك.
• لا تصميم، شاشات جاهزة بألوانك.
• لا صيانة، وأول شرط جديد من المتاجر يوقف تحديثاتك.
• لا لوحة تحكم، وكل تعديل يحتاج مبرمج.

فتدفع الفرق بعد كم شهر، مع إعادة البناء.

كيف تقلل التكلفة بدون ما تخرب المشروع

1. نسخة أولى صغيرة. الوظائف الي بدونها التطبيق ما يشتغل، بس. الباقي بعد ما تشوف الاستخدام.
2. كود مشترك للمنصتين.
3. ابدأ بتطبيق واحد إذا عندك عدة أطراف: مثلاً تطبيق السائق ولوحة، والعميل يطلب من الواتساب أو الموقع أول فترة.
4. مكونات تصميم جاهزة مع هويتك، بدل تصميم كل عنصر من الصفر.
5. نطاق مكتوب وسعر ثابت عليه، ودفع على مراحل.

كيف تطلب عرض وتقارن بين عرضين

ارسل لكل الشركات نفس الصفحة: وش المشكلة، مين المستخدم، قائمة الوظائف (أساسي / لاحقاً)، هل فيه أنظمة موجودة تحتاج ربط، والميزانية التقريبية. بدون هذي الصفحة أنت ما تقارن عروض، تقارن تخمينات. بعدها قارن على هذي، مو على الرقم:

• وش داخل السعر بالضبط، ووش برا؟ اطلبها قائمة مكتوبة.
• الخدمات الخارجية واشتراكاتها، ومين يدفعها.
• الكود والخادم وحسابات المتاجر باسم مين؟
• الدفعات مربوطة بمراحل تشوفها بعينك؟
• الضمان والصيانة بعد التسليم: كم مدتها ووش تشمل.

الشركة الي ترجع لك بأسئلة قبل الرقم هي الي تبيها. الي ترجع برقم في نفس اليوم ما قرأت.

أسئلة سريعة عن اسعار تطبيقات الجوال

ليش ما تكتبون سعر تقريبي على الأقل؟

لأن نفس «تطبيق توصيل» ممكن يكون تطبيق سائق ولوحة بس، أو ثلاث تطبيقات مع دفع وخرائط وربط بأودو، والفرق بينهم أضعاف. الرقم التقريبي بدون نطاق يضلل أكثر من ما يفيد.

كم ياخذ تطوير التطبيق وقت؟

نفس الشي الي يحدد السعر يحدد المدة: النطاق. اطلب جدول بالمراحل وتاريخ لكل مرحلة، ووش مطلوب منك قبل كل تاريخ، وحط في حسبتك مراجعة المتاجر والاختبار المغلق عند Google.

تطبيق أندرويد أرخص من آيفون؟

الفرق الحقيقي مو بين المنصتين، بين إنك تبني نسختين منفصلتين أو نسخة من كود واحد. مع Flutter أغلب الشغل مشترك، والي يختلف هو الاختبار على أجهزة أكثر، وشروط كل متجر، ورسوم حسابه.

كم تكلفة صيانة التطبيق في السنة؟

اجمع البنود: حساب Apple السنوي، الخادم، الخدمات الخارجية حسب استخدامك، وعقد الصيانة نفسه. اطلب العقد مكتوب: التحديثات الي تطلبها المتاجر، إصلاح الأخطاء، ووقت الرد. وأي نسبة جاهزة من سعر التطوير تسمعها، اسأل: مبنية على وش؟

هل Apple وGoogle ياخذون نسبة من مبيعات تطبيقي؟

بس إذا تبيع شي رقمي ينفتح داخل التطبيق: اشتراك أو محتوى أو ميزة. المنتجات والخدمات الي تنستهلك برا التطبيق تنباع ببوابة دفع عادية أو Apple Pay، وعليها عمولة البوابة بس.

الدفع كامل مقدماً ولا على مراحل؟

على مراحل دايم: دفعة عند البداية، والباقي مع كل تسليم تشوفه وتعتمده. الشركة الي تطلب المبلغ كامل قبل ما تشوف شي تحمّلك كل المخاطرة.

التطبيق يحتاج تحديث كم مرة في السنة؟

على الأقل مرة مع كل شرط جديد من المتاجر: Google تحدد كل سنة مستوى أندرويد الي لازم تستهدفه التحديثات، وApple ترفع أقل نسخة مقبولة من أدوات التطوير. وفوقها تحديثات المكتبات والأخطاء الي يكتشفها المستخدمين.

الخلاصة

تكلفة تطبيق الجوال تطلع من ثمانية بنود: الشاشات والوظائف، النظام الخلفي، لوحة التحكم، المنصات، التصميم، الربط الخارجي، النشر، والصيانة. وفوقها مصاريف شهرية وسنوية ما تنكتب في العرض. الرقم النهائي يعتمد على وش تختار في كل بند، والعرض الي يحذف بنود يبدو أرخص ويكلف أكثر.

كيف نشتغل عليها

في كيرنلتكس نبني تطبيق iOS وأندرويد من كود واحد بـ Flutter، وما نعطي سعر قبل جلسة نكتب فيها النطاق معك، وبعدها السعر ثابت عليه. ننشر التطبيق على App Store وGoogle Play بحسابات باسمك، ونسلمك الكود المصدري والخادم ولوحة التحكم. تطبيق السائق في حل تطبيقات التوصيل والنقل مبني على شغلنا في تطبيق زيتي لخدمات تغيير الزيت، ومشاريعنا الثانية في صفحة الأعمال. وإذا تبي نحدد نطاق تطبيقك سوا، احجز استشارة مجانية.